Coronavirus: Madagascar basubiye muri gumamurugo kubera ubwiyongere by'abari kwandura - rwandaroundup

Leta  ya Madagascar yatangaje izi ngamba zigomba gutangira kubahirizwa uyu munsi ku wa mbere kugeza tariki 20 y'uku kwezi kwa karindwi.

Itangazo rivuga ko "umuntu umwe gusa mu rugo ari we uzemererwa kuva mu rugo hagati ya saa kumi n'ebyiri z'igitondo na saa sita z'amanywa".

Abayobozi b'iki gihugu bavuga ko izi ngamba zigamije kugabanya ikwirakwira ry'iki cyorezo.

Leta ya Madagascar imaze gutangaza abantu 3,250 banduye Covid-19 muri bo 33 imaze kubica naho 1,135 bamaze kuyikira kuva yahagera mu kwezi kwa gatatu.

Madagascar yavuzwe cyane mu makuru mu kwezi kwa gatanu ubwo Perezida Andry Rajoelina yatangazaga ko babonye umuti ushobora kuvura no kurinda iki cyorezo.

Uyu muti muri Madagascar bise CovidOrganics ukoze mu byatsi byitwa Artemisia bisanzwe bikoreshwa mu kuvura malaria, watanzwe henshi mu mashuri mu gihugu.

Mu kwezi kwa gatanu, Umuryango w'Ubumwe bwa Afurika watangaje ko ushaka gufata ibipimo bya siyansi ngo urebe niba uyu muti ntacyo utwaye kandi unavura.

Ishami ry'umuryango w'abibumbye ryita ku buzima (OMS) ryaburiye abantu kwirinda gukoresha imiti itarapimwe mu kuvura coronavirus.