COVID-19 news: Lesotho nicyo gihugu cya nyuma Coronavirus igezemo muri Africa

Igihugu cya Lesotho cyatangaje ko hagaragaye umuntu wa mbere wanduye coronavirus,kikaba kibaye igihugu icya nyuma igezemo ku mugabane w'Afurika.

Lesotho ni igihugu cy'imisozi gifite ubuyobozi bwa cyami, kikaba kizengurutswe hose na Afurika y'epfo.
Bikaba byari byarakomeje gutangaza abantu bitewe n'ukuntu Afurika y'epfo igikikije imbande zose imaze kugira abantu 11,350 banduye Covid-19.

Mu gihe kibarirwa mu byumweru, hakomeje kumvikana kudashira amakenga ukuntu Lesotho yashoboye kwirinda iki cyorezo nubwo bwose hari urujya n'uruza rwinshi hagati yayo n'Afurika y'epfo bituranye.

Ababarirwa mu bihumbi amagana mu baturage ba Lesotho bakora akazi gatandukanye muri Afurika y'epfo.

Umupaka ugabanya ibihugu byombi wafunzwe ubwo ibihugu byombi byajyaga mu bihe bidasanzwe bya 'guma mu rugo' mu mpera y'ukwezi kwa gatatu.

Lesotho ntabwo ifite ubushobozi bwa ngombwa bwo gupima Covid-19, rero ibizamini byo kwa muganga biri koherezwa muri Afurika y'epfo gupimirwayo mu kigo cy'igihugu cyo kurwanya indwara zandura.

Hari bamwe bavuze ko ibi bishobora gutuma habaho gucyerererwa atari gusa mu kumenya abanduye no gukumira ikwirakwira ry'ubwandu bw'iyi virusi, ahubwo no gucyerererwa mu kuvura abanduye.